26. januar 2002

UPA 2002/16

 

Aalisarneq pillugu Inatsisartut inatsisaata allanngortinneqarnissaa pillugu Inatsisartut inatsisissaattut nr. xx.uu. qqq. 2002-meersussatut siunnersuut.
(Sinerissamut qanittumi aalisarnerup aamma avataasiorluni aalisarnerup akornanni pisassiissutit agguarneqarnerat, nalunaarutinik innuttaasunut aalajangersimasunut ataatsimoortunut sammitinneqartunik nalunaaruteqartarneq saqqummiussisarnerlu pillugit malittarisassat aamma tunitsivinnik nioqqutissiorfinnillu nutaanik pilersitsinermi Naalakkersuisut akuersissuteqartarnissaannik piumasaqaat).

 

§ 1.

Aalisarneq pillugu Inatsisartut inatsisaanni nr. 18, 31. oktober 1996-imeersumi kingullermillu Inatsisartut inatsisaatigut nr. 15-ikkut 12. november 2001-imeersukkut allanngortinneqartumi makku allanngortinneqarput:

 

1. § 5-imi imm. 3–tut ilanngunneqassaaq:
"Imm. 3. Kalaallit Nunaata Kitaani raajanut TAC –ip agguaanneqarnerani sinerissamut qanittumi aalisariutinut 43 %-i avataasiortunullu 57 % tunniunneqartassaaq."

2. § 10-mi nr. 5 atorunnaarsinneqarpoq.

Tamatuma kingorna nr. 6 nr. 5-inngorpoq nr. 7-ilu nr. 6-inngorluni.

3. § 10-p kingornagut paragraffitut nutaatut ilanngunneqassaaq:
"§ 10a. Aalisakkat erseqqinnerusumik nalunaarsorneqarsimasut aalisarneqarsinnaanerannut aamma aalisarnerup ingerlanneqarnissaanut atugassarititat pillugit Naalakkersuisut malittarisassiorsinnaapput.
Imm. 2. Naalakkersusiut aalisakkanik erseqqinnerusumik nalunaarsorneqarsimasunik aalisarneq pillugu nalunaarutini sukkulluunniit atuuttuni nalunaarutigineqartartut taaneqartut nalunaarutigineqartarnerat atuutilersinneqartarnerallu pillugit erseqqinnerusunik malittarisassiussaaq."
Imm. 3. Imm. 2 malillugu avammut nalunaarutit nalunaarutigineqassapput atuutilerlutillu imm. 1-imi malittarisassat malillugit. Avammut nalunaarutit Nalunaarutit-ni – Grønlands lovsamling-imi – nalunaarutigineqartassanngillat.

4. § 22-p kingorna paragraffittut nutaatut ilanngunneqassaaq:
"§ 22a. Tunitsiviit nioqqutissiorfiillu nutaat Naalakkersuisut akuersissuteqarsimatinnagit pilersinneqassanngillat. Tamanna aamma atuuppoq nioqqutissiorfiup pioreersup tunitsivittut allanngortiterneqarnissaa imaluunniit aalisakkanik allanik nioqqutissiorfinngortinneqarnissaa kissaatigineqarpat.
Imm. 2. Naalakkersuisut tunitsivinnik aamma nioqqutissiorfinnik nutaanik pilersitsineq kiisalu nioqqutissiorfiit pioreersut allanngortinneqarneri pillugit erseqqinnerusunik malittarisassiorsinnaapput."

5. § 32 ima oqaasertaqassaaq:
"§ 32. Naalakkersuisut Aalisarneq pillugu Siunnersuisoqatigiinnik pilersitsissapput kattuffinnit aamma suliffeqarfinnit aalisarnermut attuumassuteqartunit ilaasortaaffigineqartumik.
Imm. 2. Naalakkersuisut Aalisarneq pillugu Siunnersuisoqatigiit kikkunnik inutta-qartinneqassanersoq aammalu qassinik ilaasortaqassanersoq peqqussusiuutissavaat.
Imm. 3. Naalakkersuisut suliassani §§ 5, 7, 9, 10, 11, 13, 18, 20, 22 aamma 23-mut tunngasuni Aalisarneq pillugu Siunnersuisoqatigiit ilaasortaat ataatsimut imaluunniit ataasiakkaarlugit tusarniartassavaat."

 

§ 2.

Inatsisartut inatsisaat ulloq 1. juni 2002 atuutilerpoq.

Namminersornerullutik Oqartussat, ulloq #.## 2002.

Jonathan Motzfeldt

/

Hans Enoksen